अन्तर्राष्ट्रिय म्याराथनको लागि गैरआवासीय नेपाली संघद्वारा ७ लाख ५० हजार सहयोग प्रदान
काठमाडौं । गैरआवासीय नेपाली संघ (अन्तर्राष्ट्रिय समन्वय परिषद्) द्वारा नेपाल भूतपूर्व खेलाडी मन्चको आयोजनामा हुने अन्तर्राष्ट्रिय म्याराथनको लागि ७ लाख ५० हजार रुपैयाँ सहयोग प्रदान गरिएको छ ।
पोखरा महानगरपालिका मेयर धनराज आचार्य र नेपाल भूतपूर्व खेलाडी मञ्चका अध्यक्ष डिलकाजी गुरूङलाई उक्त सहयोग रकम हस्तान्तरण गरिएको हो ।
गैर आवासीय नेपाली संघ अन्तर्राष्ट्रिय समन्वय परिषदका महिला सचिव राधिका गुरूड (टीका), आइसीसी सदस्य डिलरास गुरूड र सल्लाहकार सूर्य गुरूडलगायतको उपस्थितिमा उक्त रकम हस्तान्तरण गरिएको थियो ।
कार्यक्रममा महिला राधिका गुरूड (टीका) ले भनिन्, ‘हामी सबैको साझा उद्देश्य भनेको नेपाली खेलकुदको क्षेत्रमा योगदान पुर्याउनु हो, र यस कार्यक्रमलाई सफल बनाउन हामी प्रत्येकको प्रयास महत्वपूर्ण छ ।’
नेपाल भूतपूर्व खेलाडी मञ्चले आगामी १५ फागुनमा पोखरा अन्तर्राष्ट्रिय म्याराथन आयोजना गर्ने योजनामा रहेको छ, जसले पोखरा र नेपालको खेलकुदको प्रतिष्ठा विश्वभर फैलाउन महत्वपूर्ण भूमिका खेल्ने विश्वास गरिएको छ ।
