महिला त्रिकोणात्मक टी–२० क्रिकेटमा नेपाल नेदरल्याण्ड्ससँग पराजित
काठमाडौं । महिला त्रिकोणात्मक टी–२० क्रिकेटमा नेपाल नेदरल्याण्ड्ससँग पराजित भएको छ । बिहीबार कीर्तिपुरस्थित त्रिवि क्रिकेट मैदानमा भएको खेलमा नेपाल नेदरल्याण्ड्ससँग २० रनले पराजित भएको हो ।
नेदरल्याण्ड्सले दिएको १५८ रनको लक्ष्य पछ्याएको नेपालले २० ओभरमा ७ विकेटको क्षतिमा मात्र १३७ रन बनाउन सक्यो । नेपालका लागि ओपनर सीता राना मगरले २८ रन बनाउँदा कविता जोशीले २७ रन बनाइन् । पूजा महतोले विस्फोटक ब्याटिङ गरिन् ।
उनले १४ बलमा २ चौका र २ छक्कासहित २४ रन जोडिन् । कप्तान इन्दु बर्मा ७ रनमै आउट हुँदा कविता कुँवरले ८ र रुबिना क्षेत्रीले ११ रन बनाइन् ।
यस्तै, विन्दु रावल ३ रनमा अविजित रहिन् । यसअघि टस हारेर ब्याटिङ गरेको नेदरल्याण्ड्सले निर्धारित २० ओभरमा ४ विकेटको क्षतिमा १५७ रन बनाएको थियो । अब शुक्रबार थाइल्याण्ड र नेदरल्याण्ड्सबीच खेल हुनेछ ।
