एपीएफ क्लबलाई एन्फा राष्ट्रिय महिला लिगको उपाधि
काठमाडौं । एन्फा राष्ट्रिय महिला लिगको उपाधि सशस्त्र प्रहरीको एपीएफ क्लबले जितेको छ । बुधबार दशरथ रंगशालामा भएको फाइनल खेलमा नेपाल पुलिस क्लबलाई ४–० ले पराजित गर्दै एपीएफले उपाधि जितेको हो ।
एपीएफका लागि सबिता राना मगरले दुई तथा सरु लिम्बुले एक गोल गरिन्, भने अनु लामाले अर्को गोल थपिन् ।
खेलको पहिलो हाफ गोलरहित बराबरीमा सकिएको थियो। एपीएफका लागि खेलको ६४औं मिनेटमा सबिता राना मगरले गोल गर्दै अग्रता दिलाइन् । त्यसपछि पहिलो गोल भएको पाँच मिनेटमै, खेलको ६९औं मिनेटमा सरु लिम्बुले गोल गरी एपीएफको अग्रता २–० बनाइन् ।
८३औं मिनेटमा सबिता राना मगरले व्यक्तिगत दोस्रो तथा टिमका लागि तेस्रो गोल गरिन् । खेलको अतिरिक्त समयमा अनु लामाले गोल गर्दै एपीएफलाई ४–० को शानदार जित दिलाइन् ।
