विश्वकप खेल्ने नेपाली महिला क्रिकेट टोलीको बिदाइ
काठमाडौं । आइसीसी यू–१९ महिला विश्वकप क्रिकेट खेल्न मलेसिया जाने नेपाली टोलीको बिदाइ गरिएको छ । शनिबार मलेसिया जाने टोलीलाई शुक्रबार युवा तथा खेलकुदमन्त्री तेजुलाल चौधरीले राजधानीमा आयोजित एक कार्यक्रममा बिदाइ गरेका हुन् ।
यू-१९ महिला खेलाडीलाई मन्त्री चौधरीसहित क्यान उपाध्यक्ष रोशन सिंह, सचिव पारस खड्का, सिनियन टिमकी कप्तान इन्दू वर्मालगायतले शुभकामना दिएका थिए ।
कार्यक्रममा युवा तथा खेलकुदमन्त्री चौधरीले प्रतियोगितामा नेपाली टीमले उत्कृष्ट प्रदर्शन गर्नेमा आफू विश्वस्त रहेको बताए । क्यानका उपाध्यक्ष रोशन सिंहले नेपाली महिला टीमले इतिहास बनाएको उल्लेख गर्दै नेपालले यो टिमबाट ठूलो अपेक्षा राखेको उल्लेख गरे ।
सचिव पारस खड्काले टोलीलाई कुनै पनि दबाब नलिइकन खेल्न आग्रह गरे । महिला यू-१९ विश्वकप माघ ५ गतेदेखि सुरुहुँदै छ । नेपालले समूह चरणमा अष्ट्रेलिया, बंगलादेश र स्कटल्याण्डसँग खेल्ने छ ।
नेपालको पहिलो खेल बंगलादेशसँग हुने छ । त्यसअघि विश्वकपकको अभ्यास खेलमा नेपालले वेस्टइन्डिज र अमेरिकासँग खेल्ने तालिका पनि रहेको छ । नेपालले पुस २९ मा वेस्टइन्डि र माघ २ गते अमेरिकासँग अभ्यास खेल्ने छ ।
