आर्मीद्वारा बागमती पराजित
काठमाडौँ । राजधानीमा जारी एन्फा राष्ट्रिय महिला लिगअन्तर्गत दोस्रो चरणको खेलमा विभागीय टोली त्रिभुवन आर्मी क्लबले बागमती युवा क्लबलाई पराजित गरेको छ ।
ललितपुरको सातदोबाटोस्थित अखिल नेपाल फुटबल सङ्घ (एन्फा) को मैदानमा बिहीबार भएको खेलमा आर्मीले बागमती युवा क्लबलाई २–० गोलअन्तरले पराजित गरेको हो ।
आर्मीको जितमा दुवै गोल विमला चौधरीले गरिन् । उनले खेलको पहिलो हाफमा एक गोल गरिन भने खेलको दोस्रो हाफमा अर्को गोल थपिन । विमलाले खेलको २५औँ मिनेटमा गोल गर्दै आर्मीलाई पहिलो अग्रता दिलाइन् । त्यस्तै उनले खेलको ७१औँ मिनेटमा व्यक्तिगत दोस्रो गोल थप्दै आफ्नो टोलीलाई जित दिलाइन ।
आर्मीले लिगको पहिलो चरणको खेलमा पनि बागमतीलाई ३–० गोलअन्तरले पराजित गरेको थियो । प्रतियोतिामा दोस्रो चरणमा विभिन्न पाँच टोली सहभागी छन् । आगामी माघ १६ गतेसम्म चल्ने अन्तिम चरणको लिगमा विभागीय टोलीहरु नेपाल पुलिस क्लब, नेपाल एपिएफ क्लब, आर्मी, वालिङ नगरपालिका र बागमती सहभागी छन् । शुक्रबार पुलिस र वालिङ नगरपालिकाबीच प्रतिस्पर्धा हुनेछ ।
