नेपाली क्रिकेटले असम्भव लाग्ने कल्पनालाई सम्भव बनायो

नारायण गाउँले ।
साधनस्रोत चाहिन्छ, पैसा चाहिन्छ तर सबैभन्दा बढी ‘सही मान्छे सही ठाउँमा’ चाहिन्छ । नेपाल प्रिमियर लिगको भव्य समापनले यही सिकायो । देशमा एउटा गतिलो क्रिकेट स्टेडियम छैन । खेलडीलाई अभ्यास गर्ने मैदान पनि छैन । काठमाडौंबाहिर त अन्तर्राष्ट्रिय स्तरको ग्राउण्ड पनि छैन । न पर्याप्त पैसा छ न ठूला ठूला स्पोन्सर नै छन् । ग्राउण्ड नै पर्याप्त नभएको ठाउँमा होमग्राउण्ड भन्ने त कुरै भएन । अलि महँगो टिकट काटेर दर्शक एकै ठाउँमा हेर्न आउने ग्यारेन्टी पनि छैन, त्यसका लागि पूर्वाधार पनि छैन । यस्तोमा भारतदेखि न्युजिल्याण्डसम्मका अन्तर्राष्ट्रिय खेलाडीलाई ‘अक्सन’मा राखेर यस्तो व्यावसायिक लिग सम्भव हुन्छ भन्ने कल्पना पनि आफैमा स्वैरकल्पनाजस्तो थियो । सम्भव हुन सक्ने कुरा पनि गलत मान्छे हुँदा कल्पना जस्तो लाग्दो रहेछ । सही मान्छे हुँदाचाहिँ असम्भव पनि सम्भव हुँदो रहेछ ! नेपाली क्रिकेटले असम्भव लाग्ने कल्पनालाई सम्भव बनायो ।

स्टेडियम बनाउन लागेको भए केही वर्ष लाग्दो हो । पूर्वाधार जोड्नतिर लागेको भए केही समय पर्खनुपर्दो हो । सरकारको मुख ताकेको भए शायद फाइलमैं अड्केर युग बित्दो हो । हिँड्ने योजनाको मुख्य काम बाटो बनाउन अलमलिनु होइन हिँड्नु नै हो । नेपाली क्रिकेट पनि हिँड्यो । बाटो त अब नबनी सुखै छैन । आफैं बन्दै जान्छ । यो हिँडाइलाई आभार यो पागलपनलाई सलाम !
सन्दीप लामिछानेलाई आइपीएलमा देखेर खुसी हुने हामी शिखर धवनलाई हाम्रो जर्सीमा देख्न पाउने अवस्थामा आयौँ । यसका लागि पारस खड्का र समग्र टीमलाई धन्यवाद, विजेतालाई बधाई ! देश पनि यसै गरी हिँड्न पर्नेछ अब । हामीसँग पूर्वाधार छैन । क्यापिटल पनि छैन र सबैभन्दा ठूलो कुरा सही मान्छे सही ठाउँमा छैन । पूर्वाधार रातारात बन्दैन, पूँजी एक दिनमा निर्माण हुँदैन । तैपनि सही ठाउँमा सही मान्छे पुग्ने हो भने केही त पक्कै हुन सक्ने रहेछ ! अब हिँड्ने कि !