एनपीएलमा विराटनगर किङ्ग्सको पहिलो जित, लुम्बिनी २ विकेटले पराजित
काठमाडौं । नेपाल प्रिमियर लिग (एनपीएल) मा विराटनगर किङ्ग्सले लुम्बिनी लायन्सलाई २ विकेटले पराजित गरेको छ । लुम्बिनीले दिएको १९२ रनको लक्ष्य विराटनगरले अन्तिम बल बाँकी छँदा ८ विकेट गुमाएर भेटायो ।
विराटनगरका लोकेश बमले ७१ रन बनाए । यस्तै बसिर अहमदले ४०, मार्टिन गप्टिलले २८, क्रिस सोलले ४ बलमा नटआउट १४ रन बनाए । लुम्बिनीका दुर्गेश गुप्ताले ३ विकेट लिए ।
यसअघि टस हारेर ब्याटिङको निम्तो पाएको लुम्बिनीले २० ओभरमा ७ विकेट गुमाएर १ सय ९१ रन बनायो । लुम्बिनीका कप्तान रोहित पौडेलले ४६, टस मूर्सले ३० रन बनाए ।
लुम्बिनीले २९ अतिरिक्त रन पायो । विराटनगरका कप्तान सन्दीप लामिछाने, इस्माल आलम र राजेश पुलामीले १/१ विकेट लिए । लुम्बिनीका ४ जना खेलाडी रनआउट भए । प्रतियोगितामा विराटनगरको यो पहिलो जित हो । विराटनगर यसअघि दुई वटा खेलमा पराजित भएको थियो ।
