विश्वकप क्रिकेटमा नेपाली टोलीले नयाँ जर्सी लगाउने
काठमाडौं । नेपाल क्रिकेट संघ (क्यान)ले आइसीसी टी-२० विश्वकप क्रिकेटका लागि नयाँ जर्सी सार्वजनिक छ । नेपाली टिमले जुनमा हुन लागेको विश्वकप क्रिकेटमा लगाउने जर्सी सोमबार एक कार्यक्रमकाबीच सार्वजनिक गरिएको हो ।
जर्सी प्रायोजन केल्मीले गरेको छ भने त्यसमा नेपालको झण्डा र प्रयोजकहरुका लोगोलाई नयाँ तरिकाले प्रस्तुत गरेको जनाइएको छ । नेपालले आइसीसी टी-२० विश्वकप दोस्रो पटक खेल्दै छ । वेस्टइन्डिज र अमेरिकामा हुन लागेको विश्वकपमा नेपाल समूह डीमा रहेको छ ।
यो समूहमा नेपालसहित श्रीलंका, बंगलादेृश, नेदरल्याण्ड्स र दक्षिण अफ्रिका रहेका छन् । विश्वकपको पहिलो खेलमा नेपालले जुन ४ तारिखमा नेदरल्याण्ड्ससँग खेल्ने छ । अहिले प्रयोगमा रहेको जर्सी २०७८ भदौमा डिजाइन गरिएको हो ।
त्यतिबेला प्रतिस्पर्धाबाट आदर्श पोखरेलले डिजाइन गरेको जर्सी छनोट गरेर सार्वजनिक गरिएको थियो । जर्सीको अघिल्लो भागमा विश्वकै सर्वोच्च शिखर सगरमाथा, नेपालमा मात्र पाइने दुर्लभ एकसिंगे गैंडा र राष्ट्रिय प्रतीकलाई समावेश गरिएको थियो ।
