भारतलाई साफ च्याम्पियनसिपको उपाधि
काठमाडौं । साफ च्याम्पियनसिपको उपाधि भारतले जितेको छ । मंगलबार भारतको बैंग्लोरमा निर्धारित र अतिरिक्त सममा एक एक गोलको बराबरी भएपछि खेलको नतिजा पेनाल्टीसूटआउटबाट निकालिएको हो । जसमा भारत ५–४ गोल अन्तरले विजयी भयो । पेनाल्टीमा कुवेतका मोहम्म्द अब्दुल्लाहको प्रहार बारमा लागेर बाहिरिएको थियो ।
यस्तै, खालेद हाजियाको प्रहार भारतका गोलकिपर गुरप्रीत सिंहले बचाए । यता, भारतका उदान्त सिंहको प्रहार बाहिरियो । उदान्तको प्रहार बाहिरिदा खेल सडन डेथमा पुगेको थियो । खेलको १५औँ मिनेटमा सबाईब अलखाल्दीले गोल गर्दै कुवेतलाई अग्रता दिलाएका थिए । तर, ३९औँ मिनेटमा लालियन्जुएला चान्टेले गोल गरेपछि भारत खेलमा फर्किएको थियो ।
यो प्रतियोगितामा कुवेत र लेबनान पहिलो पटक सहभागी भएका थिए । जसमा कुवेत उपविजेता बन्न सफल भयो । भारतको साफ उपाधि संख्या ९ पुगेको छ ।
