साफ च्याम्पियनसिप फुटबलमा नेपाल भारतसँग पराजित
काठमाडौं । नेपाल साफ च्याम्पियनसिप फुटबल प्रतियोगिताबाट बाहिरिएको छ । शनिबार भारतसँग भएको खेलमा २–० गोल अन्तरले पराजित भएको नेपाल १४ औं संस्करणको प्रतियोगिताबाट बाहिरिएको हो ।
बैंग्लोरमा भएको खेलमा पहिलो हाफ गोलरहित बराबरी खेले पनि नेपालले दोस्रो हाफमा आफूलाई सम्हाल्न सकेन । भारतसँग नेपाल लगातार चौथो पटक पराजित हुन पुग्यो । भारतका लागि सुनिल क्षेत्री र महेश सिंह नाओरेमले एक एक गोल गरे । ६१ औं मिनेटमा सुनिल क्षेत्री गोल गर्दै भारतलाई अग्रता दिलाएका थिए ।
यसैगरी ७० औं मिनेटमा महेश सिंह नाओरेमले गोल गरेपछि भारत २–० ले अघि बढेको थियो । त्यसपछि थप गोल नभएपछि घरेलु टोली भारत सेमिफाइनलमा स्थान बनाउन सफल भयो । नेपाल भने एक खेल अगावै प्रतियोगितबाट बाहिरिएको छ ।
नेपालले अब प्रतियोगिताको अन्तिम खेलमा पाकिस्तानसँग खेल्ने छ । नेपाल र पाकिस्तान भने समूह चरणबाट बाहिरिएका छन् । अब नेपाल र पाकिस्तानबीच मंगलबार औपचारिकताका लागि खेल हुने छ ।
