मलेसियाले नेपाललाई दियो २ सय ३६ रनको लक्ष्य
काठमाडौं । एसीसी प्रिमियर कप क्रिकेटमा मलेसियाले नेपाललाई २ सय ३६ रनको लक्ष्य दिएको छ । मंगलबार कीर्तिपुर मैदानमा टस जितेर पहिला ब्याटिङ गरेको मलेसियाले निर्धारित ५० ओभरमा ९ विकेट गुमाएर २ सय ३५ रन बनायो ।
मलेसियाका कप्तान अहमद फैजले सर्वाधिक ७६ रन बनाए । त्यस्तै, विरनदीप सिंहले ४६ रन जोडे । नेपालका सोमपाल कामी र सन्दीप लामिछानेले समान ३÷३ विकेट लिए । त्यस्तै, ललित राजवंशी २ र गुलसन झाले १ विकेट लिए । नेपालले केहीबेरमा जवाफी ब्याटिङ गर्नेछ। मलेसियासँगका पछिल्ला ५ वटा खेलमध्ये नेपाल सबैमा विजयी भएको छ ।
प्रिमियर कपको समूह ’ए’ मा नेपाल, ओमान, कतार, मलेसिया र साउदी अरब र समूह ’बी’ मा यूएई, हङकङ, कुवेत, सिङ्गापुर र बहराइन छन् । नेपालले तीन खेल कीर्तिपुर मैदानमा र एउटा खेल मूलपानीमा खेल्नेछ ।
नेपालले दोस्रो खेल वैशाख ८ गते ओमानसँग खेल्नेछ । नेपालले साउदी अरबसँग वैशाख ११ गते मूलपानीमा खेल्नेछ । त्यस्तै, वैशाख १४ गते कतारसँग नेपालको खेल हुनेछ । सेमिफाइनल वैशाख १६ गते र फाइनल वैशाख १८ गते हुनेछ । एसीसी प्रिमियर प्रतियोगिताको विजेता टोलीले सेप्टेम्बरमा पाकिस्तानमा हुने एसिया कप खेल्न पाउनेछ ।
