ए डिभिजन लिगमा सातदोबाटोलाई हराउदै जावलाखेल शीर्षमा, एनआरटी र चर्च ब्वाइज बराबरी
काठमाडौं । जावलाखेल युथ क्लब शहिद स्मारक ’ए’ डिभिजन लिग फुटबलको शीर्ष स्थानमा उक्लिएको छ । मंगलबार एन्फा कम्प्लेक्समा भएको खेलमा सातदोबाटो युथ क्लबलाई २–१ गोल अन्तरले हराउँदै जावलाखेल शीर्ष स्थान उक्लिएको हो ।
जावलाखेलको जितमा फोडे फोफाना र एनकोटो मोसाबीले एक एक गोल गरेका थिए । त्यस्तै सातदोबाटोका दीपक सिंह ठकुरीले एक गोल फर्काए ।
जारी लिगमा जावलाखेलको छैटौं खेलमा चौंथो जित हो भने सातदोबाटोको यो दोस्रो हार हो । यो जितपछि जावलाखेलको ६ खेलमा १३ अंक भएको छ र लिगको शिर्ष स्थानमा उक्लिएको छ ।
त्यसैगरी सातदोबाटोको ६ खेलमा १२ अंक छ र लिगमा दोस्रो स्थानमा रहेको छ । त्यस्तै आजै च्यासल मैदानमा भएकोे अर्को खेलमा न्युरोड टिम एनआरटी र चर्च ब्वाइज युनाईटेडले बराबरी खेल्दै अंक बाँडेका छन् ।
च्यासल मैदानमा मंगलबार एनआरटी र चर्च ब्वाइजले २–२ गोलको बराबरी खेलेका हुन् । चर्च ब्वाइजका लागि आशिष चौधरी र कप्तान अनन्त तामाङले एक एक गोल गरेका थिए भने एनआरटीका लागि रोशन खड्गी र सरोज तामाङले एक एक गोल गरेका थिए । यस बराबरीसँगै एनआरटीले ६ खेलमा ३ अंक जोडेको छ भने चर्च ब्वाइजको ६ खेलमा १२ अंक भएको छ ।
