मुम्बई इण्डियन्सलाई पहिलो वुमन्स प्रिमियर लिगको उपाधि
काठमाडौँ । पहिलो वुमन्स प्रिमियर लिगको उपाधि मुम्बई इण्डियन्सले जितेको छ । आइतबार राति भएको फाइनल खेलमा मुम्बई इण्डियन्सले दिल्ली क्यापिटल्सलाई ७ विकेटले पराजित गर्दै पहिलो सिजनको वुमन्स प्रिमियर लिगको उपाधि जितेको हो ।
दिल्लीले दिएको १३२ रनको लक्ष्य पछाएको मुम्बईले १९.३ ओभरमा ३ विकेट गुमाउदै लक्ष्य पुरा गरेको हो ।
मुम्बईको जितमा नाट स्किभर ब्रन्टले अविजित ६० रन बनाएकी थिइन् भने कप्तान हर्मनप्रित कौरले ३७ रन बनाएकी थिइन् ।
यस अघि टस जितेर पहिला ब्याटिंग गरेको दिल्लीले २० ओभरमा ९ विकेट गुमाउदै १३१ रन बनाएको थियो ।
पहिलो सिजनको वुमन्स प्रिमियर लिगमा मुम्बई र दिल्लीसहित युपी वारियर्स, रोयल च्यालेन्जर्स बैंगलोर र गुजरात जाइन्ट गरी पाँच टिमले भाग लिएका थिए ।
दिल्ली समुहमा शिर्ष स्थानमा रहदै फाइनलमा पुगेको थियो भने दोस्रो स्थानमा रहेको मुम्बईले तेस्रो स्थानमा रहेको युपीसँग इलिमिनेटर जितेर फाइनलमा पुगेको थियो ।
