माघ ७ गते ‘राइट टु प्रोटिन रन’ हाफ म्याराथन हुँदै
काठमाडौं । नेपाल भेटेरिनरी एसोसिएसनले आयोजना गर्ने दोस्रो संस्करणको राइट टु प्रोटिन रन हाफ म्याराथनको तयारी पूरा भएको छ ।
आयोजकले बिहीबार काठमाडौंमा पत्रकार सम्मेलन गरि तयारी पूरा भएको जानकारी दिएको हो । राइट टु प्रोटिनको मर्मलाई आत्मसात गर्दै प्रोटिनजन्य पदार्थमा पहुँच बढाउन जनचेतना जगाउने उद्देश्यका साथ माघ ७ गते हाफ म्याराथन आयोजना गर्न लागिएको हो ।
दशरथ रंगशालाबाट सुरु हुने हाफ म्याराथनसहितका विभिन्न विधामा झण्डै पाँच हजारको सहभागिता रहने एसोसिएसनले जनाएको छ ।
पत्रकार सम्मेलनमा अध्यक्ष सितलकाजी श्रेष्ठले ३३ सय भन्दाबढी खेलाडीले नाम दर्ता गराइसकेका जानकारी दिएका छन् । यस म्याराथनमा सबैभन्दा कम ६ वर्ष र सर्वाधिक धेरै ७२ वर्षका खेलाडीको सहभागिता रहनेछ ।
गत वर्ष पहिलो संस्करण रन फर प्रोटिन हाफ म्याराथन भएको थियो । गत वर्षको हाफ म्याराथन महिलातर्फ १३ औं दक्षिण एसियाली खेलकुद (साग) की स्वर्ण पदक विजेता सन्तोषी श्रेष्ठ र पुरुषतर्फ तीर्थ पुन विजयी भएका थिए ।