क्रिकेट प्रतियोगिताको ट्रफी सार्वजनिक
धनगढी । ‘लिटरफ्लावर प्रिमियर लिग’ विद्यालयस्तरीय यु–१९ राष्ट्रिय क्रिकेट प्रतियोगिता पाँचौँ संस्करणको धनगढीमा ट्रफी सार्वजनिक गरिएको छ ।
धनगढी उपमहानगरपालिकाका प्रमुख नगरप्रमुख नृपबहादुर वडले शुक्रबार लिटल फ्लावर स्पोर्टस एण्ड इभेन्टस धनगढीको आयोजनामा हुने विद्यालयस्तरीय यु–१९ राष्ट्रिय क्रिकेट प्रतियोगिताको पाँचौँ संस्करणको ट्रफी सार्वजनिक गरेका हुन् । सो अवसरमा उनले क्रिकेट खेलको विकास, विस्तार र खेलप्रति जनचेतना बढाउन प्रतियोगिताको भूमिका महत्वपूर्ण हुने बताए ।
लिटल फ्लावर स्पोर्टस् एण्ड इभेन्टस धनगढीका अध्यक्ष रामचन्द्र शाहीले देशभरीका विद्यालयको सहभागितामा सञ्चालन हुने यस प्रतियोगिताले विद्यालय तहमा क्रिकेट खेलप्रति अभिरुचि बढेको बताए । प्रतियोगिताबाट विद्यालयस्तरमा लुकेर रहेका क्रिकेट खेलाडी बाहिर आइरहेका र आफ्नो क्षमतालाई विकास गर्न सक्षम भइरहेकाले यो प्रतियोगिता गरिराख्न हौसला मिलेको उनको भनाइ छ ।
देशभरीका १६ विद्यालयको सहभागिता हुने प्रतियोगिताको विजेता टिमले एक लाख २० हजार र उपविजेताले ६० हजार रुपैयाँ प्राप्त गर्नेछन् ।
त्यस्तै उत्कृष्ट खेलाडीले १० हजार, उत्कृष्ट बलरले पाँच हजार, उत्कृष्ट व्याट्स म्यानले पाँच हजार र उदयमान खेलाडीले पाँच हजार प्राप्त गर्नेछन् । विगत वर्षदेखि सञ्चालन हुँदै आएको प्रतियोगिता धनगढीस्थित सङ्घीय प्रहरी एकाइ कार्यालयको खेल मैदानमा फागुन १५ देखि २९ गतेसम्म सञ्चालन हुने बताइएको छ ।
