क्यानको वार्षिक साधारणसभा मंसिर ३ गते हुने
काठमाडौं । नेपाल क्रिकेट संघ(क्यान)को वार्षिक साधारणसभा आगामी मंसिर ३ गते हुने भएको छ । क्यानको शनिबार बसेको बोर्ड बैठकले मंसिर ३ गते साधारणसभा गर्ने निर्णय गरेको हो । त्यस्तै बैठकले राष्ट्रिय क्रिकेट टिमका पुरुष र महिला खेलाडीको वर्गीकरण सच्याएको छ । परिमार्जन भएको वर्गीकरणमा बलर सोमपाल कामी ‘ए’ श्रेणीमा राखिएको छ ।
यस अघि उनी ‘बी’ मा थिए । यस्तै ‘सी’ मा रहेका अविनास बोहरालाई ‘बी’ मा राखिएको छ । यस अघि कन्ट्रयाक्टमा नपरेका ललित नारायण राजवंशीलाई ‘बी’ र सन्दीप जोहरालाई ‘सी’ मा राखिएको छ । महिलातर्फ सरस्वती चौधरीलाई ‘बी’ तथा ममता चौधरी र सुमन खतिवडालाई ‘सी’ श्रेणीमा राखिएको छ ।
यस अघि गत असोज ६ गते चितवनको भरतपुरमा बसेको क्यानको बोर्ड बैठकले पुरुष तथा महिला खेलाडीको वर्गीकरण तयार गरेको थियो । त्यस्तै क्यानले मङ्सिर १० गतेबाट राष्ट्रिय टोलीको बन्द प्रशिक्षण पनि गर्ने निर्णय गरेको छ ।
