सहिद स्मारक ‘ए’ डिभिजन लिग फुटबलमा मछिन्द्रको पहिलो हार

काठमाडौं । सातदोबाटोस्थित एन्फा कम्प्लेक्सको मैदानमा सहिद स्मारक ‘ए’ डिभिजन लिग फुटबलमा शीर्ष स्थानमा रहेको मछिन्द्र क्लब हिमालयन शेर्पा क्लबसँग पराजित भएको छ । हिमालयन शेर्पाको यो पहिलो जित हो भन्ने मछिन्द्रको पहिलो हार हो ।

शुक्रबार खेलमा हिमालयन शेर्पाले मछिन्द्रलाई २–० ले हराएको छ । खेलको पहिलो मिनेटमा नै मछिन्द्रका पिटर सेगुनको आत्मघाती गोलबाट अग्रता बनाएको शेर्पाले २० औँ मिनेटमा विजय श्रेष्ठको गोलमार्फत अग्रता दोब्बर पारेको थियो । लिगको शीर्ष स्थानमा रहेको मछिन्द्रले हिमालयन शेर्पाको खेलबाट अग्रता बढाउने अवसर गुमाएको हो । अहिलेसम्म ७ खेलमा ४ जित र २ बराबरी र १ हारसहित १३ अंक भएको मछिन्द्र दोस्रो स्थानमा छ । आर्मी क्लबको ६ खेलमा १३ अंक नै भए पनि गोल भिन्नताका आधारमा आर्मी शीर्षमा रहेको हो । ७ खेलमा १ जित २ हार र ४ बराबरी खेलेको हिमालयन शेर्पा क्लबको ७ अंक रहेको छ ।

लिग अन्तर्गत शनिबार दुई खेल हुनेछन्। पहिलो खेल जावलाखेल युथ क्लब र नेपाल पुलिस क्लब साथै दोस्रो खेल मनाङ मस्र्याङ्दी क्लब र थ्री स्टारबीच हुनेछ ।