इरानकी एकमात्र ओलम्पिक पदक विजेता महिला खेलाडी किमियाद्वारा देश छाड्ने घोषणा
इरानकी एकमात्र महिला ओलम्पिक पदक विजेता खेलाडी किमिया अलिजादेहले देश छाड्ने घोषणा गरेकी छन् । २१ वर्षिया किमियाले सामाजिक संजालमार्फत आफू इरानको पाखण्ड, अन्याय र चाप्लुसीको हिस्सा बन्न नचाहेकाले देश छाड्न लागेको उल्लेख गरेकी छन् ।
उनले आफू पनि इरानमा सताइएका लाखौं इरानी महिलामध्ये एक भएको लेखेकी छन् । हाल उनी कहाँ छिन् भनेर उनले सो पोस्टमा कुनै जानकारी दिएकी छैनन् । तर इरानी संचारमाध्यमका अनुसार यतीबेला प्रशिक्षणका क्रममा उनी नेदरल्याण्डमा हुन सक्ने बताएका छन् ।
उनले रियो दि जेनेरियोमा सन् २०१६ मा भएको ओलम्पिकमा तेक्वान्दोबाट काँस्य पदक जित्दै इरानमा इतिहास बनाएकी थिइन् । बुधबार युक्रेनी जहाजलाई इरानले भूलवश मिसाइल आक्रमणबाट खसालेको भन्दै क्षमा मागेको थियो । दुई दिनसम्म इरानले यसलाई अस्विकार गरेर लुकाएको विरोधमा इरानमा शनिबारबाट प्रदर्शन शुरु भएको छ।
