मनाङ र मच्छिन्द्र क्लबबीचको खेलमा झगडा गर्ने ६ खेलाडी कारबाहीमा
काठमाडौं । सहिद स्मारक ए डिभिजन लिगअन्तर्गत मनाङ मस्र्याङ्दी क्लब र मच्छिन्द्र क्लबबीच भएको खेलमा झगडा गर्ने खेलाडी कारबाहीमा परेका छन् ।
एन्फाको अनुशासन समितिले ६ जना खेलाडीलाई कारबाही गर्ने बिहीबार निर्णय गरेको हो । अखिल नेपाल फुटबल संघ (एन्फा) ले मनाङका मिडफिल्डर जगजित श्रेष्ठ र गोलकिपर अशोक बराललाई ५ /५ खेलको प्रतिबन्ध लगाएको छ ।
झगडा गरेपछि रातो कार्ड पाएका बरालले थप एक खेलको प्रतिबन्ध झेल्नु पर्नेछ । यस्तै मनाङका फरवार्ड रञ्जन विष्ट २ खेलको प्रतिबन्धमा परेका छन् । मच्छिन्द्रका दीपक राई, देवेन्द्र तामाङ र विजय धिमाललाई भने २/२ खेलको प्रतिबन्ध लगाइएको छ ।
जगजित र अशोकलाई हजार रुपैयाँ जरिवाना पनि गरिएको छ । मनाङका किट्स व्यवस्थापक शिव लामालाई सिजनको लिगका बाँकी खेलमा प्रतिबन्ध लगाइएको छ भने १० हजार रुपैयाँ जरिबाना गरिएको छ । यस्तै दुवै क्लबलाई ५०/ ५० हजार रुपैयाँ जरिबाना गर्ने पनि एन्फाले जनाएको छ।
