बुटवल ब्लास्टर्सद्वारा धनगढी ब्लुज ७ विकेटले पराजित
काठमाडौं ।पोखरामा जारी पोखरा प्रिमियर लिग अन्तर्गत बुटवल ब्लास्टर्सले धनगढी ब्लुजलाई पराजित गरेको छ । सोमबारको दोस्रो खेलमा बुटवल ब्लास्टर्सले धनगढी ब्लुजलाई ७ विकेटले पराजित गरेको हो । जितसँगै बुटवल प्लेअपमा प्रवेश गरेको छ ।
१ सय ४१ रनको औषत लक्ष्य पछ्याएको बुटवलले अफ्ताव उद्दिन अहमेदको आक्रमक अर्धशतकको सहायतामा १६ दशमलव ४ ओभरमै लक्ष्य पुरा गर्यो । अहमेदले २३ बलमा १ चौका र ७ छक्काको सहायतामा ५२ रन बनाए ।
हर्स टोङ्कले ४० रन बनाउँदा शङ्कर राना २५ रनमा पभेलियन फर्किए । यो खेलमा धनगढी पराजित भएसँगै ४ खेलमा एउटा मात्र खेल जितेर अंकतालिकाको पुछारमा छ । समान ४ खेल खेलेको बुटवल ३ जित निकाल्दै ६ अंकसहित तालिकाको दोस्रो स्थानमा छ ।