महिला भलिबल च्याम्पियनसिपको उपाधि नेपाललाई
काठमाडौं । नेपाली महिला भलिबल टोलीले ऐतिहासिक उपाधि जित्न सफल भएको छ । बिहीबार भएको एसियन भलिबल कन्फेडेरेसन (एभिसी) सेन्ट्रल जोन सिनियर महिला भलिबल च्याम्पियनसिपको उपाधि नेपालले जित्न सफल भएको हो । नेपालले फाइनल खेलमा माल्दिभ्सलाई सोझो सेटमा पराजित गरेको हो ।
बंगलादेशको ढाकास्थित सहिद सुहरावर्दी ईन्डोर स्टेडियममा भएको खेलमा पहिलो सेट २५–१३ ले जितेको नेपालले दोस्रो सेट २५–१२ जितेको हो । निकै नै आक्रामक भएको नेपाली टोलीले तेस्रो सेट २५–८ मा जित्दै नेपाली महिला भलिबल इतिहासमा पहिलो अन्तर्राष्ट्रिय उपाधि जित्न सफल भएको हो ।
यसअघि नेपालले प्रतियोगितामा अफगानिस्तान, कीर्गिस्तान, बंगलादेश र माल्दिभ्सलाई हराएको थियो ।
