आबुखैरेनी । बाढी तथा प्राकृतिक विपत्तिबाट प्रभावित नागरिकको राहतका लागि तनहुँको आबुखैरेनीका स्थानीयवासीले आफ्नो क्षमता र गच्छेअनुसार खाद्यान्न, लत्ताकपडा तथा दैनिक जीवनमा आवश्यक पर्ने विभिन्न घरायसी सामग्री संकलन गरी प्रभावित परिवारलाई सहयोग गरेका छन्।
विपत्तिमा परेका परिवारलाई तत्काल आवश्यक पर्ने सामग्री उपलब्ध गराउने उद्देश्यले सञ्चालन गरिएको अभियानमा स्थानीयवासीले आर्थिक सहयोगसँगै दैनिक उपभोगमा प्रयोग हुने विभिन्न सामग्री उपलब्ध गराएका हुन्। संकलित सामग्रीमा नुनदेखि दाँत सफा गर्ने सामग्री, कान सफा गर्ने सामग्री, खाद्यान्न, कपडा तथा अन्य आवश्यक घरायसी सामानसमेत रहेका छन्।
आबुखैरेनीका युवाहरूको सक्रिय सहभागितामा संकलित राहत सामग्री नुवाकोटको देवीघाट तथा धादिङका गल्छी र गजुरी क्षेत्रका बाढीपीडित परिवारलाई हस्तान्तरण गरिएको छ। प्रभावित क्षेत्रमा पुगेका युवाहरूले स्थानीय आवश्यकता बुझ्दै संकलित सामग्री सम्बन्धित परिवारसम्म पुर्याएका हुन्।
सहयोगको आकारभन्दा पनि विपत्तिमा परेका परिवारको पीडामा साथ दिने उद्देश्यले सबैलाई आफ्नो ठाउँबाट योगदान गर्न आह्वान गरिएको अनिल श्रेष्ठले बताए । सोहीअनुसार कसैले खाद्यान्न, कसैले कपडा र कसैले दैनिक जीवनमा आवश्यक पर्ने घरायसी सामग्री उपलब्ध गराएका थिए।
अभियानमा युवाहरूको सक्रियताले राहत संकलनदेखि प्रभावित क्षेत्रमा सामग्री पुर्याउनेसम्मको कामलाई सहज बनाएको थियो। विपत्तिको समयमा समुदायभित्र उपलब्ध स्रोत र साधन परिचालन गरेर प्रभावित परिवारलाई तत्काल आवश्यक सहयोग उपलब्ध गराउन सकिने उदाहरणका रूपमा स्थानीयवासीले यस अभियानलाई लिएका छन्।
प्राकृतिक विपत्तिका बेला सरकारी निकाय तथा विभिन्न संघसंस्थाबाट हुने उद्धार र राहत प्रयाससँगै स्थानीय समुदायको सहभागिताले प्रभावित परिवारसम्म आवश्यक सामग्री छिटो पुर्याउन महत्वपूर्ण भूमिका खेल्ने देखिन्छ। आबुखैरेनीवासीको पहलले विपत्तिलाई साझा सामाजिक जिम्मेवारीका रूपमा लिएर समुदायस्तरबाट पनि सहयोग जुटाउन सकिने सन्देश दिएको छ।
आर्थिक सहयोगमा मात्र सीमित नरही दैनिक जीवनमा आवश्यक पर्ने स-साना सामग्रीसमेत संकलन गरी प्रभावित परिवारसम्म पुर्याइएको यो अभियानले विपत्तिमा मानवीय संवेदना र सामुदायिक एकताको महत्वलाई उजागर गरेको छ।
प्रतिक्रिया