सिरहा । निरन्तरको वर्षासँगै आएको बढीले सिरहा र धनुषा जोड्ने कमला नदीमा बनाइएको अस्थायी ‘डाइभर्सन’ बगाएको छ।
हुलाकी राजमार्गअन्तर्गत निर्माण भइरहेको पुलको विकल्पमा अस्थायी रूपमा बनाइएको ‘डाइभर्सन’ शनिबार बाढीले बगाएको हो। डाइभर्सन पुनः क्षतिग्रस्त भएपछि हाल सयौँ सवारीसाधन र यात्रु बीच बाटोमै रोकिएका छन्।
केही दिनअघि पनि वर्षाले क्षति पुर्याएपछि मर्मत गरी डाइभर्सन सञ्चालनमा ल्याइएको थियो। सहायक प्रमुख जिल्ला अधिकारी चेतराज बरालका अनुसार नदीमा पानीको बहाव उच्च रहेकाले हाल मर्मत गर्ने अवस्था छैन।
‘पश्चिमपट्टि पानीको बहाव धेरै छ। पानीको सतह घटेपछि नगरपालिकाको जेसिबी प्रयोग गरी बाँध निर्माणको काम अघि बढाइनेछ,’ बरालले भने।
कमला नदीमाथिको पुल निर्माणमा भएको ढिलाइले स्थानीय बासिन्दा सास्ती खेप्दै आएका छन्। पुल निर्माण नहुँदा बर्खायाममा ज्यान जोखिममा राखेर डुंगा चढ्नुपर्ने वा घण्टौँ घुमेर पूर्व–पश्चिम राजमार्गको प्रयोग गर्नुपर्ने बाध्यता रहेको छ।
प्रतिक्रिया