तोरीले पहेँलपुर नवलपरासीका फाँट
नवलपुर । यतिवेला नवलपरासी बर्दघाट–सुस्तापूर्वका अधिकांश फाँट तोरी फुलेर पहेँलपुर भएका छन् । अधिकांश स्थानमा बारी, खाली जमिनदेखि ठुला फाँटमा लगाइएको तोरी फुलेर पहेँलै देखिन्छन् ।
जिल्लामा तोरी लगाउने क्षेत्रफलसँगै उत्पादन बढेका कारण नवलपुरले तोरीमा आफ्नो ‘साख’ पुनः फर्काउँदै गएको छ । गैँडाकोट– ४ का रामप्रसाद खनियाँले यसपालि गैँडाकोटका प्लटिङदेखि ठुला फाँटमा समेत तोरीखेती गरिएको बताए । ‘अहिले सबैतिर तोरी फूलेको दृश्य देख्न सकिन्छ । विगतमा गहुँ लगाउने खेतमा समेत यसवर्ष तोरी देखिन्छ,’ उनले भने । खनियाँले आफूले पनि यस वर्ष करिब २० कट्ठा क्षेत्रफलमा तोरीखेती गरेको बताए ।
कावासोती– १७ का नन्दराम गुरौले तोरीको माग र तेलको मूल्य बढ्न थालेपछि यसतर्फ आकर्षण बढेको बताए । ‘तोरी लगायो भने घरबाटै बिक्री हुन्छ, आम्दानी पनि राम्रो ,’ उनले भने, ‘अरू बाली लगाउँदा सिँचाइ, मल तथा विषादी धेरै हाल्नुपर्छ, तर तोरीमा थोरै मिहिनेत गर्दासमेत राम्रो उत्पादन हुन्छ।’ उनले एक बिघामा तोरी लगाएका छन् ।
कृषि ज्ञान केन्द्र नवलपुरका अनुसार पछिल्लो तीन वर्षको तथ्यांक हेर्दा जिल्लामा तोरीखेती गरिने क्षेत्रफलमा उतारचढाव आएको भए पनि उत्पादकत्व भने लगातार बढेको देखिन्छ । कार्यालयका कृषिप्रसार अधिकृत एवं सूचना अधिकारी विश्वास काफ्लेले जिल्लामा आर्थिक वर्ष ०७९/८० मा एक हजार १८५ हेक्टर र आव ०८०/८१ मा एक हजार १७८ हेक्टर क्षेत्रफलमा तोरीखेती भएको बताए । यस्तै, चालू आव ०८१/८२ मा एक हजार १८७ हेक्टर क्षेत्रफलमा तोरीखेती गरिएको केन्द्रले जनाएको छ ।
आव ०७९/८० मा जिल्लामा एक हजार २८५ मेट्रिक टन तोरीको उत्पादन हुँदा उत्पादकत्व प्रतिहेक्टर १.०८ मेट्रिक टन रहेको सूचना अधिकारी काफ्लेले जानकारी दिए । आव ०८०/८१ मा एक हजार २८३ मेट्रिक टन तोरी र उत्पादकत्व प्रतिहेक्टर १.०९ मेट्रिकटन पुगेको छ । अघिल्ला वर्षमा भन्दा यस वर्ष तोरीको क्षेत्रफलसमेत वृद्धि भएकाले उत्पादकत्वसमेत बढ्ने अनुमान गरिएको काफ्लेको भनाइ छ ।
