अचानक आएको हावाहुरीका कारण फेला तालमा डुंगा पल्टिँदा…
गण्डकी । फेवातालमा डुंगा दुर्घटनामा परेका पाँच जनालाई सशस्त्र प्रहरीको फेवाताल किनाराको उद्धार टोली सकुशल उद्धार गरेको छ । फेवातालमा मंगलबार दिउँसो डुंगा दुर्घटनामा परेको थियो ।
अचानक आएको हावाहुरीको कारण डुंगा पल्टिँदा काठमाडौंका ३० वर्षीय विक्रम मिकरानी, २६ वर्षीया आशिफा भानु, ५४ वर्षीया अनैजा दिल शाह, ८ वर्षीया रजिना खातुन र करिब डेढ वर्षीया मिरा रानी तालमा खसेका थिए । उनीहरुको फेवातालमा रहेको माछापालन केन्द्रको जालमा अड्किएको अवस्थामा सशस्त्र प्रहरीले उद्धार गरेको हो ।
फेवाताल रेस्क्यु वाच टावरमा खटिएका विपद् व्यवस्थापनको टोलीले उनीहरूलाई सकुशल उद्धार गरेको हो । उनीहरूको अवस्था सामान्य रहेको छ । यसअघि चैत २५ र २९ गते पनि फेवातालमा हावाहुरीका कारण डुंगा पल्टिएको थियो । त्यतिबेला पनि सशस्त्र प्रहरीले एक महिला र पुरूषलाई सकुशल उद्धार गरेको थियो ।
