कुटपिटको विरोधमा सडकमा निस्किए चिकित्सक(फोटोफिचर)
काठमाडौं । चिकित्सकमाथि कुटपिट गरेको विरोधमा स्वास्थ्यकर्मीहरुले काठमाडौंमा प्रदर्शन भएको छ । मंगलबार काठमाडौंको माइतीघर मण्डलमा स्वास्थ्यकर्मीहरुले विरोध प्रदर्शन गरेका हुन् ।
प्रदर्शनमा काठमाडौंका विभिन्न अस्पतालका चिकित्सक तथा स्वास्थ्यकर्मी सहभागी भएका थिए । सोमबार पोखराको मणिपाल अस्पतालमा एक जना बिरामीको मृत्यु भएपछि मृतकका आफन्तले चिकित्सकमाथि कुटपिट गरेका थिए । त्यस्तै आइतबार राति लमजुङ जिल्ला अस्पतालमा बेसीशहर नगरपालिका– ७ का वडाध्यक्ष ऋषिराम बस्नेतले चिकित्सकमाथि कुटपिट गरेका थिए ।
यसअघि गत भदौ २७ गते हेटौंडाको सञ्चो अस्पतालमा बिरामीका आफन्तले दुई जना चिकित्सकमाथि कुटपिट गरेका थिए । चिकित्सकहरूले स्वास्थ्यकर्मी तथा स्वास्थ्य संस्थाको सुरक्षा सम्बन्धी पहिलो संशोधन ऐन २०७८ कार्यान्वयनको माग गरेका छन् । उनीहरुले गृहमन्त्रीको राजीनामा तथा आफूहरुलाई विदेश जान बाध्य नपार्न भन्दै नाराबाजी गरेका थिए ।
