कञ्चनपुरमा बाढीमा फसेका महिलाको सशस्त्र प्रहरीले यसरी गर्यो उद्धार(भिडियोसहित)
महेन्द्रनगर । कञ्चनपुरको स्याली नदीको बाढीमा फसेका शुक्लाफाँटा नगरपालिका–७ कालापानीका दुई महिलाको गए राति सकुशल उद्धार गरिएको छ । भैँसी चराउन हिरापुरफाँटामा गएका अन्दाजी ३५ वर्षीया गौमती साउद र ४० वर्षीया निर्मला भण्डारीको सशस्त्र प्रहरी, नेपाल प्रहरी र जनप्रतिनिधिको टोलीले उद्धार गरेको हो ।
चुरे क्षेमा अत्यधिक वर्षा हुदा स्याली नदीमा बाढी आएपछि भैँसी चराउन गएका दुवै नदीपारि बस्न बाध्य भएका थिए । नदीमा आएको बाढीका कारण तर्न नसकेर महिला थुनिएको खबर आएपछि सशस्त्र प्रहरीको टोलीले उद्धार गरेको सशस्त्र प्रहरी उपरीक्षक प्रेम रावलले जानकारी दिए । नदीमा पानीको बहाव उच्च भए पनि सकुशल उद्धार गर्न सफल भएको उनले बताए ।
