धरानमा पनि अनधिकृत संरचना हटाउन चल्यो डोजर
धरान । धरान उपमहानगरपालिकाले पनि अनधिकृत संरचना हटाउन डोजर चलाएको छ र आइतबार बिहान धरान ५ स्थित बहुजातीय खेल मैदान नजिकै बनेको घर डोजर लगाएर भत्काइएको छ । अवैध रूपमा खोलाको उकास क्षेत्र ओगटेर बनाइएको भन्दै खेल मैदान नजिकै रहेको सनिबोटे तथा अधेरी खोलाको किनारामा बनेको घर उपमहानगरको डोजरसहित नेपाल प्रहरी, सशस्त्र प्रहरी र नगर प्रहरीको टोलीले भत्काएको हो ।
पूर्ववडाध्यक्ष सन्तोष लिम्बूसहित स्थानीयको विरोधका बावजुत उक्त घर भत्काउने क्रममा सामान्य झडपसमेत भएको थियो । झडपमा स्थानीयले गरेको ढुङ्गा प्रहारबाट उपमहानगरपालिकाको डोजरका सिसा फुटेका छन् भने झडपमा एक जना स्थानीय घाइते भएको बताइएको छ ।
पहिला देखिनै उक्त जग्गाको भोगचलन गर्दै आएको भन्दै स्थानियले खोलाको भाग सिमांकन गर्नुपर्ने पनि माग राखेका थिए । यसअघि पनि बन्दै गरेका अवस्थामा उक्त घर भत्काउन नगर प्रहरीसहितको टोली डोजर लिएर उक्त स्थानमा पुगेका थियो र तर स्थानीयको विरोधका कारण घर नभत्काई फर्किएको थियो ।
उपमहानगरपालिकाका नगर प्रहरी प्रमुख विष्णु कोइरालाले भने, ‘यो तेस्रो पटक हो । हामीले बनाउन सुरु गरे देखिनै । नोटिस दिएका थियौँ । दोस्रो पटक जाँदा हामीले कागजी रूपमा तयार नभएकाले फर्कियौँ अहिले तयार भएरै गएका थियौ ।’
यसअघि पनि घर भत्काउन उपमहानगरको टोली आएपछि घर नभत्काउन अन्तरिम आदेश माग गर्दै स्थानीय मुना चौधरी लिम्बू जिल्ला अदालत पुगेपनि अदालतले निवेदकले मागे अनुरूप अन्तरिम आदेश जारी गरिरहनु नपर्ने बताएको थियो ।
