रुपन्देहीका डीएसपी ठगबहादुर केसी पक्राउ
बुटवल । ईलाका प्रहरी कार्यालय बुटवलका प्रहरी नायव उपरीक्षक (डिएसपी) ठगबहादुर केसी पक्राउ परेका छन् । प्रहरी प्रधान कार्यालयको निर्देशनमा काठमाडौंबाट आएको अनुसन्धान टोलीले आइतबार साँझ केसीलाई निवासबाटै नियन्त्रणमा लिएको हो ।
तर घटना गुपचुप राखिएको छ । सुनको कारोवार सम्बन्धी मुद्धामा रकम असुली गरेको बिषयमा अनुसन्धान गर्न भन्दै आएको प्रहरी टोलीले आइतबार साँझ निवासमा खानतलासी गर्दा लाखौं नगद समेत फेला पारेको ईलाका प्रहरी कार्यालय श्रोतले बताएको छ ।
गत मंसिर महिनामा बुटवलका एक व्यापारीले ल्याएको सुन नियन्त्रणमा लिएर आफैंले राखेको सूचना पाएपछि प्रहरी प्रधान कार्यालयले उनीहरुमाथि छानविन शुरु गरेको थियो । आइतबार साँझ बुटवल आएको प्रहरी टोलीले केसीको निवासबाट ३५ तोला सुन र २५ लाख रुपैयाँ नगद समेत बरामद गरेको प्रहरी बताइएको छ ।
केसीले सुन नियन्त्रणमा लिई व्यापारीसँग २५ लाख रुपैयाँ मागेका थिए। आइतबार व्यापारीले २५ लाख रुपैयाँ बुझाएपनि सुन फिर्ता लिन नपाउँदै केसीलाई प्रहरीको छानविन टोलीले नियन्त्रणमा लिएको हो ।
यसअघि नै इलाका प्रहरी कार्यालयबाट जिल्ला प्रहरी कार्यालय कास्कीमा सरुवा भएका केसी सोमबार रमाना लिई जाने तयारीमा थिए । करिब १३ महिना अघि बुटवल आएका केसीले असुली धन्दा चलाएका समाचार पटकपटकसार्वजनिक भएका थिए ।
जिल्ला प्रहरी कार्यालय रुपन्देहीका प्रमुख प्रहरी उपरीक्षक रबिन्द्र रेग्मीले यसबारे आफूले पनि थाह पाएको तर आधिकारिता बारे बुझ्न अनुसन्धान टोलीलाई भेट्न जान लागेको बताए । ‘म अनुसन्धान टोलीलाई भेट्दैछु, त्यसपछि आधिकारीक कुरा के हो बताउँला,’ रेग्मीले भने।
