दाङको जंगलमा किशोर–किशोरीको शव गाडिएको अवस्थामा फेला
दाङ । दाङको जंगलमा एक जोडी किशोर–किशोरीको शव गाडिएको अवस्थामा फेला परेको छ । तुलसीपुर उपमहानगरपालिका–१३ दमारगाउँको जंगलमा गाडिएको अवस्थामा किशोर–किशोरीको शव भेटिएको हो ।
भेटिएको शव दमारगाउँकै १५ वर्षीया रोशनी महतारा क्षेत्री र दंगिशरण गाउँपालिका–६ थपगाउँका १४ वर्षीय शरद आचार्यको रहेको इलाका प्रहरी कार्यालय तुलसीपुरका डीएसपी पुष्पराज मल्लले जानकारी दिए ।
गाईवस्तु चराउन गएका स्थानीयले गन्ध आएपछि खनेर हेर्दा शव देखेका थिए। त्यसपछि प्रहरीलाई खबर गरेका थिए । स्थानीयको खबरपछि फरेन्सिक विज्ञसहितको टोली गएर उत्खनन् गरेर शव निकालिएको डीएसपी मल्लले बताए ।
उनीहरु असोज २७ गते हराएको भन्दै असोज २८ गते प्रहीको निवेदन समेत परेको थियो। गाडिएको अवस्थामा दुई जनाको शव भेटिएकाले हत्याको आशंका गरिएको छ ।
