भारतको बराबंकी जिल्लामा बसलाई ट्रकले ठक्कर दिंदा ४ नेपालीको मृत्यु
काठमाडौं । भारत उत्तर प्रदेशको बराबंकी जिल्लामा रोकिराखेको बसलाई ट्रकले ठक्कर दिंदा ४ जना नेपालीको मृत्यु भएको छ भने २४ जना घाइते भएका छन् ।
रुपैडिहाबाट गोवातर्फ गइरहेको बसलाई उत्तर प्रदेशको बाराबंकी जिल्लास्थित रामनगर थाना क्षेत्रको महंगुपुर गाउँ नजिक शनिबार बिहान ट्रकले ठक्कर दिएको थियो ।
घाइते मध्ये ६ जनाको अवस्था चिन्ताजनक रहेको भारतीय प्रहरीले जनाएको छ । प्रहरीकाअनुसार घाइतेको बाराबंकी जिल्ला अस्पताल र लखनउस्थित ट्रमा सेन्टरमा उपचार भइरहेको छ । बसको टायर पन्चर भएपछि सडक छेउमा रोकेर चालकले टायर फेर्दै गरेको बेला पछाडिबाट ट्रकले ठक्कर दिएको थियो । बसमा ६० जना कामदार रहेको बताइएको छ ।
