सशस्त्र प्रहरीका हवल्दारनै खैरो हेरोइनको कारोबारमा संलग्न
काठमाडौँ । प्रहरीले खैरो हेरोइनको कारोबारमा संलग्न भएको आरोपमा सशस्त्र प्रहरीका हवल्दारसहित ११ जनालाई पक्राउ गरेको छ । नेपाल प्रहरीको लागूऔषध नियन्त्रण ब्यूरोले उनीहरुलाई पक्राउ गरेको हो ।
पक्राउ पर्नेमा लालबहादुर बुढाथोकी, अजय तामाङ, दोलखाका कौशल बस्नेत, सिन्धुपाल्चोकका समीर घले गुरूङ, झापाका अन्जान राई, सञ्जय लक्सम्बा, पुकार गुरूङ, प्रविण भण्डारी, सुनिल ताजपुरिया, भारत दार्जिलिङका श्यामल सिंह रहेका छन् ।
त्यस्तै लागुऔषधको कारोबारमा संलग्न रहेको आरोपमा सशस्त्र प्रहरीका हवल्दार खगेन्द्र भुजेललाई पनि पक्राउ गरिएको ब्यूरोका प्रवक्ता तथा एसपी जीवनकुमार श्रेष्ठले जानकारी दिए । पक्राउ परेकाहरुको साथबाट ३२२.६ ग्राम हेरोइन बरामद भएको ब्यूरोले जनाएको छ । सुरुमा एक जनालाई पक्राउ गरी ती व्यक्तिले दिएको बयानका आधारमा अन्य १० जनालाई पक्राउ गर्न ब्यूरो सफल भएको एसपी श्रेष्ठले बताए ।
प्रहरीका अनुसार माघ २४ गते एक सय मिलिग्राम ब्राउन सुगरसहित म्याग्दीको मंगला गाउँपालिका– ५ स्थायी घर भई काठमाडौंको बुढानिलकण्ठ बस्दै आएका २५ वर्षीय बुढाथोकीलाई पक्राउ गरिएको थियो । उनीमार्फत दोलखाको भीमेश्वर नगरपालिका– १३ स्थायी ठेगाना भएका २५ वर्षीय बस्नेत र सिन्धुपाल्चोक घर भएका गुरुङ बूढानिलकण्ठबाटै २१ ग्राम ब्राउन सुगरसहित पक्राउ परेका थिए ।