सल्यानमा बस दुर्घटना हुँदा ९ जनाको मृत्यु
सल्यान । सल्यानमा यात्रु बस दुर्घटना हुँदा मृत्यु हुनेको संख्या ९ पुगेको छ । सल्यानबाट दाङको तुलसीपुरतर्फ गइरहेको रा १ ख २५५२ नम्बरको बस कपुरकोट गाउँपालिका– ५ खारखोलामा दुर्घटना हुँदा ९ जनाको मृत्यु भएको छ ।
दुर्घटनास्थलमा ५ जना र उपचार गर्न लैजाने क्रममा बाटोमा ४ जनाको मृत्यु भएको जिल्ला प्रहरी कार्यालय सल्यानका डिएसपी गोविन्द थापाले जानकारी दिए । घाइतेहरुलाई उपचारका लागि नेपालगञ्ज र सल्यानतर्फ लगिएको छ । बस सडकबाट २ सय मिटर तल खोलामा खसेको हो । घाइतेहरुको स्थानीय बासिन्दा र प्रहरीले उद्दार गरेका छन् ।
बसमा ३० यात्रु रहेका बताइएको छ । दशैँको बेला मुगुको राराछायाँनाथमा यात्रु बस दुर्घटना हुँदा ३३ जनाको मृत्यु भएको थियो । नेपालका पहाडी मार्गहरूमा प्रत्येक वर्ष चाडवाडका बेला ठूला दुर्घटनामा परी धेरै मानिसले ज्यान गुमाउने गरेका छन्।
