तारकेश्वरबाट नक्कली डिएसपी पक्राउ
काठमाडौं । आफूलाई नेपाल प्रहरीको डाक्टर/मेडिकल प्रहरी नायब उपरीक्षक (डिएसपी) भनी ठगी गरेको अभियोगमा प्रहरीले एक जनालाई पक्राउ गरेको छ ।
काठमाडौं जिल्ला तारकेश्वर नगरपालिका वडा नम्बर ६ जरङगूका कृष्णप्रसाद ढुङ्गानालाई महानगरीय अपराध महाशाखाको टोलीले पक्राउ गरेको हो ।
ढुङ्गानालाई तारकेश्वर नगरपालिकामा संचालन गरेको भिक्टोरिया फार्मेसीबाट पक्राउ गरी थप आवश्यक अनुसन्धान भइरहेको महाशाखाले जनाएको छ । महाशाखाले उनीबाट कोही पीडित भएको भए सम्पर्क गर्न अनुरोध गरेको छ ।
ढुंगानाको साथबाट प्रहरीले नेपाल प्रहरीको विभिन्न पदहरूको यूनिफर्म लगाएका फोटा तीन थान, प्रहरी नायब उपरीक्षकको यूनिफम एक थान, नेपाल प्रहरीको जर्सी एक थान र मोबाईल सेट एकथान बरामद गरेको छ ।
