१० लाख नगदसहित तस्कर पक्राउ गर्ने महिला प्रहरी बनिन् ‘पुलिस अफ द मन्थ’
बाँके । वडा प्रहरी कार्यालय नेपालगञ्ज, बाँकेमा दरबन्दी भई हाल भन्सार सुरक्षा गार्डमा कार्यरत प्रहरी जवान सुनीता कुँवर बाँकेको ‘पुलिस अफ द मन्थ’ भएकी छन् । कुँवरलाई १ हजार नगद पुरस्कारसहित कदरपत्र प्रदान गरिएको हो ।
कुँवरले भन्सारमा जाँच गर्ने क्रममा भारतबाट अवैध रुपमा नेपाल ल्याउँदै गरेको १० लाख भारतीय रुपैयाँसहित एक जनालाई नियन्त्रणमा लिन सफल भएकी थिइन् ।
तस्करी नियन्त्रणमा उल्लेखनीय भूमिका निर्वाह तथा विभागीय मूल्य मान्यता, आदेश निर्देशनको पालना गरी व्यावसायिक, इमानदार र कर्तव्यनिष्ठ रहेको आधारमा कुँवरलाई उक्त पुरस्कार दिइएको जिल्ला प्रहरी कार्यालय बाँकेले जनाएको छ ।
