बैंकिङ कसुरमा १२ करोड जरिवाना र तीन वर्षको जेल सजाय सुनाइएकी महिला पक्राउ
काठमाडौं । बैंकिङ कसुरमा अदालतले झन्डै १२ करोड रुपैयाँ जरिवाना र तीन वर्ष जेल सजायको फैसला भई फरार भएकी एक अभियुक्तलाई प्रहरीले पक्राउ गरेको छ ।
पक्राउ पर्नेमा काभ्रेपलाञ्चोक बनेपा ४ श्रीखण्डपुरकी ५६ वर्षीया जयन्ती केसी छिन् । जिल्ला प्रहरी कार्यालय काभ्रेका अनुसार केसीलाई बिहीबार दिउँसो बनेपाबाट पक्राउ गरिएको हो ।
काभ्रेका प्रहरी उपरीक्षक रवि पौडेलका अनुसार केसीलाई घरबाहिर लुकिछिपी बसिरहेको अवस्थामा पक्राउ गरिएको हो । केसीलाई उच्च अदालत पाटनले बैंकिङ कसुरमा २०७१ साल वैशाख २९ गते ११ करोड ८२ लाख ९२ हजार ११६ रुपैयाँ जरिवाना हुने फैसला गरेको थियो । फैसलायता उनी फरार थिइन् ।
फरार अभियुक्तको खोजीको सिलसिलामा केसीलाई विशेष सूचनाका आधारमा पक्राउ गरिएको प्रहरी उपरीक्षक पौडेलले बताए । केसीलाई जरिवानासँगै तीन वर्ष कैद हुने फैसला अदालतले गरेको थियो ।
पौडेलका अनुसार केसीलाई इलाका प्रहरी कार्यालय बनेपाबाट खटिएको टोलीले पक्राउ गरेको हो । उनलाई बिहीबार नै फैसला कार्यान्वयनको लागि अदालत पेश गरिएकोमा काभ्रे जिल्ला अदालत धुलिखेलले कैद र जरिवाना भुक्तानको लागि कारागार पठाएको छ ।