भक्तपुरबाट अवैध लागूऔषध कारोवारमा संलग्न तीन जना पक्राउ
काठमाडौं । लागूऔषध कारोबारमा संलग्न तीन जनालाई प्रहरीले पक्राउ गरेको छ । ना.३ ख.९८९ नम्बरको कन्टेनरमा अबैध लागूऔषध ओसारपसार गरी भक्तपुरको सल्लाघारी क्षेत्रमा कारोवार गर्ने गरेको भन्ने विशेष सूचनाका आधारमा प्रहरीले मंगलबार विहान उनीहरुलाई पक्राउ गरेको हो ।
पक्राउ पर्नेमा सिन्धुपाल्चोकका विष्णु प्रधान, डम्बरबहादुर प्रधान र शंकर खड्का रहेका छन् । सल्लाघारीस्थित अरनिको राजमार्गको दक्षिण तर्फको किनारामा कन्टेनर रोकी राखेको अवस्थामा कन्टेनरको चालकको सिटमुनी लुकाएर राखेको लागूऔषध बरामद गरेको प्रहरीले जनाएको छ । प्रहरीले उनीहरुको साथबाट डाईजापाम २९५० एम्पुल, नाईट्रोभेट ३००० एम्पुललगायतका लागूऔषध बरामद गरेको छ ।
