सेनाले भक्तपुरमा एकैदिन तयार गर्यो १५० वेडको आइसोलेसन कक्ष
भक्तपुर । नेपाली सेनाले भक्तपुरमा एकैदिनमा १५० वेडको आइसोलेशन तयार गरेको छ । सेनाले भक्तपुरस्थीत सैनिक महाविद्यालयको बीबीए ब्लकमा एक दिनमै १५० बेडको आइसोलेशन कक्ष तयार गरेको हो ।
उक्त ब्लकमा २५ वटा कोठा रहेका र प्रत्येक कोठामा कम्तीमा ६ जनालाई राख्न सकिने सेनाले जनाएको छ । आइसोलेशनको व्यवस्थापन तीन समूहले गर्नेछन्, जसमा व्यवस्थापकीय टीम, मेडिकल टिम र हाइजिन तथा फोहरमैला टिम रहने सूर्य विनायक व्यारेकका गणपति प्रमुख सेनानी शिव प्रसाद पौडेलले जानकारी दिए ।
उक्त आइसोलेशनमा पहिलो चरणमा संक्रमित सैनिक तथा आश्रित परिवारलाई राखिने उनले बताए । सेनाले यसअघि भक्तपुरको सूर्यबिनायकमा ७५ वेडको आइसोलेशन कक्ष तयार गरेको थियो । योसंगै भक्तपुरमा सेनाले २२५ बेडको आइसोलेशन कक्ष तयार गरेको छ ।
