गोदावरी नगरपालिकाका प्रमुख प्रशासकीय अधिकृत जैसीविरुद्ध भ्रष्टाचार मुद्दा दायर
काठमाडौं । अख्तियार दुरुपयोग अनुसन्धान आयोगले गोदावरी नगरपालिका, ललितपुरका प्रमुख प्रशासकीय अधिकृत कृष्णप्रसाद जैसी र सवइन्जिनियर किशोर कुमार मोक्तानविरुद्ध एक लाख पचास हजार रुपैयाँ कायम गरी घुस रिसवत लिई भ्रष्टाचार गरेको भन्दै विशेष अदालतमा मुद्दा दायर गरेको छ ।
निर्माणाधिन आयोजनाको बिल भुक्तानीका लागि सेवाग्राहीसँग घुस रिसवत माग गरिरहेको भन्ने सूचना एवं उजुरीको आधारमा अख्तियार दुरुपयोग अनुसन्धान आयोग टंगालबाट खटिई गएको टोलीले जैसी र मोक्तानलाई सेवाग्राहीबाट एक लाख पचास हजार रुपैयाँ घुसबापतको रकम लिइरहेको बेला नियन्त्रणमा लिइएको थियो ।
त्यस्तै आयोगले गौतमबुद्ध अन्तर्राष्ट्रिय विमानस्थल, भैरहवामा करार सेवामा कार्यरत कार्यालय सहयोगी विश्वनाथ प्रसाद लोध र मतियार महेन्द्र प्रसाद यादवविरुद्ध बिगो ४ लाख कायम गरी भ्रष्टाचार मुद्दा दायर गरेको छ ।
