अपहरणपछि भान्जाको हत्या गरी फरार रहेका अभियुक्त १३ वर्षपछि पक्राउ
काठमाडौं । भान्जाको अपहरण पश्चात हत्या गरेर फरार अभियुक्तलाई प्रहरीले १३ वर्षपछि पक्राउ गरि सार्वजनिक गरेको छ । महानगरीय अपराध महाशाखा काठमाडौंले आइतबार पत्रकार सम्मेलन गरी भारतको मुजफ्फापुरका ४५ वर्षीय राजेश कुमार गुप्तालाई सार्वजनिक गरेको हो । महाशाखाको टोलीले सर्लाहीको मलंगवाबाट उनलाई शनिबार पक्राउ गरी काठमाडौं ल्याएको थियो ।
प्रहरीका अनुसार २०६४ साल असोज २४ गते गुप्ताले तत्कालिन समयमा राई स्कुल जोरपोटीमा कक्षा ७ मा अध्ययनरत खिचाँपोखरी बस्ने रोहित गुप्तालाई अपहरण गरेका थिए ।
उनले रोहितका बुबा बासुदेव गुप्तासँग २ लाख ५० हजार फिरौती मागेकोमा सो रकम बुझाएर पनि अपहरण मुक्त नभएको र खोजतलासका क्रममा असोज २७ गते बालकको शव कमलादीस्थित गणेश मन्दिर सडक पेटीमा प्लाष्टिकको बोरामा पोको पारेको अवस्थामा फेला परेको महाशाखाका प्रमुख बरिष्ठ प्रहरी उपरीक्षक दिपक थापाले जानकारी दिए ।
घटनामा बालकको सहोदर मामा गुप्ताले धादिङका विष्णु सुनारको समेत संलग्नता रहेको खुलेपछि उनलाई २०६४ मंसिर १२ गते नै पक्राउ गरेको र निज हाल कारागारमा रहेको प्रहरीले जनाएको छ ।
