करोडौं ठगी गरी फरार अभियुक्त भक्तपुरबाट पक्राउ
काठमाडौं । महानगरीय अपराध महाशाखा काठमाडौंको टोलीले ठगी गरी फरार रहेका एक अभियुक्तलाई पक्राउ गरेको छ । झापाको दमकका २९ वर्षका चन्दन जिन्दललाई पक्राउ गरेको हो। झापा, बारा, पर्सा, सर्लाहीका बिभिन्न व्यक्तिहरुलाई बिभिन्न बहानामा ठगी फरार रहेका उनलाई प्रहरीले भक्तपुरको ठिमीबाट पक्राउ गरेको हो ।
उनलाई जिल्ला प्रहरी कार्यालय बारामा बैंकिङ कसुर मुद्दा दर्ता भई उच्च अदालत जनकपुर अस्थायी इजलाश वीरगन्जबाट र इलाका प्रहरी कार्यालय दमक झापामा ठगी मुद्दा दर्ता भई झापा जिल्ला अदालतबाट पक्राउ पूर्जी जारी भएको थियो ।
उनले २२ जना व्यक्तिबाट जम्मा सात करोड एकासी लाख बयालीस हजार रुपैयाँ बराबरको ठगी तथा बैंकिङ कसूर गरेको खुल्न आएको प्रहरीले जनाएको छ । अभियुक्त जिन्दललाई महानगरीय अपराध महाशाखाको टोलीले पक्राउ गरी आवश्यक कारवाहीका लागि जिल्ला प्रहरी कार्यालय बारा पठाएको छ ।
