प्रहरीले यसरी फेला पार्यो उपत्यकामा हराएका मोटरसाइकल

काठमाडौं । प्रहरीले काठमाडौं उपत्यकामा विभिन्न समयमा हराएका मोटरसाइकल खोजी गरी सम्बन्धित धनीलाई बुझाएको छ । प्रहरीले विभिन्न स्थानबाट चोरी भई फेला परेका २० वटा मोटरसाइकल तथा स्कुटरहरु आइतबार सम्बन्धित धनीलाई हस्तान्तरण गरेको छ ।

आइतबार आयोजित पत्रकार सम्मेलनमा महानगरीय प्रहरी परिसर काठमाडौंका प्रमुख श्यामलाल ज्ञवालीले मोटरसाइकल तथा स्कुटर चोरी भएको उजुरी परेको आधारमा खोजी गरी फेला परेको जानकारी दिए ।

यातायात व्यवस्था विभाग र ट्राफिक प्रहरीको समन्वयमा सम्बन्धित धनी पत्ता लगाई हस्तान्तरण गरिएको हो । चोरी भएका ती मोटरसाइकलहरु मोडिफाई गरिएको, नम्बर प्लेट परिवर्तन गरिएको अवस्थामा फेला परेका ज्ञवालीले जानकारी दिए ।