पूर्वआईजिपी ठकुरी सजाय भुक्तान गरी जेलमुक्त
काठमाडौं । सुडान घोटाला प्रकरणमा दोषी ठहर भएका नेपाल प्रहरीका पूर्वआइजिपी रमेश चन्द ठकुरी सजाय भुक्तान गरी छुटेका छन् । ठकुरी बिहीबार थुनामुक्त भएका हुन् । जेलबाट छुटेपछि ठकुरीले आफूमाथि भएको पक्षपातपूर्ण कारबाहीविरुद्ध फेरि सङ्घर्ष गर्ने उद्घोष गरेका छन् ।
गतवर्ष असार १९ मा सर्वोच्च अदालतमा आत्मसमर्पण गरेका ठकुरीलाई फैसला कार्यान्वयनका लागि डिल्लीबजार कारागार पठाएको थियो ।
सर्वाेच्च अदालतका तत्कालिन प्रधानन्याधीश सुशीला कार्कीसहितको इजलासले तीन वर्षअघि ठकुरीसहित पूर्वआईजीपी ओमविक्रम राणा, हेमबहादुर गुरुङ, पूर्वअतिरिक्त महानिरीक्षक (एआईजी) दिपकसिंह थाङदेन, पूर्वप्रहरी नायब महानिरीक्षक दीपक श्रेष्ठ लगायतलाई दोषी ठहर गरेको थियो । संयुक्त राष्ट्र संघको शान्ति मिसनमा सुडानको डार्फरमा जाने संगठनका सदस्यको वन्दोवस्तीको सामान खरिदमा भ्रष्टाचार गरेको अदाललते प्रमाणित गरेको थियो ।