सरकार ‘ब्यूँझाउन’ बालुवाटारमा धर्नामा बसेका माथि प्रहरी हस्तक्षेप(फोटो फिचर)
काठमाडौं । सरकारको कामको आलोचना गर्दै विरोधमा उत्रिएका युवाहरुको समूहको प्रदर्शनमा प्रहरी हस्तक्षेप भएको छ । प्रहरीले उनीहरुलाई लाठीचार्ज र पानीको फोहराले हानेको थियो । कोरोना संक्रमणले स्थिति भयावह बन्दै जाँदा पनि सरकार सुतेको आरोप लगाउँदै सामाजिक सञ्जालबाट जुटेका युवाहरु बालुवाटारमा धर्ना दिन पुगेका थिए ।
उनीहरुले सरकार ब्यूँझाउन भन्दै शान्तिपूर्ण धर्नाका लागि आह्वान गरेका थिए । सामाजिक दुरी कायम राख्दै धर्नाका लागि पुगेका उनीहरुलाई बल प्रयोग गरेर प्रहरीले हटाएको हो । करिब डेढ घन्टा लगातार धर्ना दिएपछि आएका प्रहरीले २५ जनाभन्दा धेरै भेला हुन नपाइने भन्दै माइकिङ गरेका थिए ।
त्यसपछि धर्नामा सहभागी युवाहरुलाई पानीको फोहाराले प्रहार गरिएको थियो भने लाठीचार्ज गरिएको थियो। धर्नाका लागि पुगेकाहरले सरकार खोई, पीसीआर परीक्षण गर, १० अर्बको हिसाब चाहियो लगायतका नारा लेखिएका प्लेकार्ड प्रदर्शन गरेका थिए ।
