१७ करोड ८३ लाख अकुत सम्पत्ति आर्जन गरेको अभियोगमा अवकाशप्राप्त कर्मचारीविरुद्ध मुद्दा दर्ता

काठमाडौं । अकुत सम्पत्ति आर्जन गरेको अभियोगमा अख्तियार दुरुपयोग अनुसन्धान आयोगले अवकाशप्राप्त शाखा अधिकृत ऋषिराम अर्यालविरुद्ध विशेष अदालतमा मुद्दा दायर गरेको छ । अयोगले बुधबार अर्यालविरुद्ध मुद्दा दायर गरेको हो । ३६ वर्ष सरकारी सेवा गरेर अधिकृतबाट अवकाश पाएका अर्यालले सेवा अवधिमा २६ करोड ६० लाख ६९ हजार ६२ रूपैयाँ आर्जन गरेको पाइएको छ । गाविस सचिवका रूपमा ०३९ मा सेवा प्रवेश गरेर अधिकृत हुँदै अवकास ऋषिराम अर्यालले आफ्नो जागिरे अवधिमा यति धेरै रकम आर्जन गरेका हुन् ।

आयोगका प्रवक्ता प्रदीपकुमार कोइरालाका अनुसार, आयोगले गरेको अनुसन्धानका क्रममा उनले पद र अधिकार दुरूपयोग गरेर अकुत सम्पत्ति आर्जन गरेको फेला परेको छ । अर्यालले जागिरे अवधिमा २६ करोड ६० लाख ६९ हजार ६२ रूपैयाँ आम्दानी गरेको भेटिएको छ । आयोगका अनुसार, यसमा ८ करोड ७७ लाख २७ हजार ४ सय ८३ रूपैयाँको मात्र स्रोत खुलेको छ । बाँकी १७ करोड ८३ लाख ४१ हजार ५ सय ७९ रूपैयाँको स्रोत खुलेको छैन ।

अर्यालसहित उनका छोरा, श्रीमतीविरुद्ध विशेष अदालतमा मुद्दा दायर गरिएको प्रवक्ता कोइरालाले जानकारी दिए । कोइरालाका अनुसार, गैरकानुनी ढंगले आर्जित १७ करोड ८३ लाख ४१ हजार ५७९ रूपैयाँ बिगो दाबी गरी मुद्दा दायर गरिएको छ ।