‘आइसोलेसनका लागि हाम्रो घर प्रयोग गर्नुस्’
काठमाडौं । नेपालमा कोरोना भाइरसको जोखिम बढिरहेका बेला व्यक्तिले नै आफ्नो घर आइसोलेसनका लागि प्रयोग गर्न दिने घोषणा गर्न थालेका छन् । सामाजिक सञ्जाल फेसबूकमार्फत चिराग गोयलले सिफलमा रहेको आफ्नो घर पनि आइसोलेसनका लागि सित्तैमा दिने घोषणा गरेका छन् ।
उनले फेसबुकमा घरको फोटो राख्दै लेखेका छन्, ’घरमा केही मर्मत गर्नुपर्ने पनि छ, यदि कसैले आइसोलेसनका रूपमा घर प्रयोग गर्न चाहन्छ भने हामीले छिटै मर्मत गर्नेछौं ।’ उनले घरलाई आइसोलेसनको रूपमा प्रयोग गर्न चाहनेले आफूलाई म्यासेज गर्नसमेत आग्रह गरेका छन् ।
त्यसैगरी कुलेश्वरका लालचन्द्र गौतमले पनि कोरोना भाइरस संक्रमितलाई उपचार गर्नका लागि आफ्नो घर आइसोलेसन बनाउन प्रस्ताव गरेका छन् । सामाजिक सञ्जाल फेसबुकमार्फत गौतमले आइसोलेसनका लागि कसैलाई घर चाहिएको भए कुलेश्वरको लिंकरोडमा रहेको आफ्नो घर खाली रहेको बताएका छन् । सरकारले मात्रै सबैलाई सहयोग गर्न नसक्ने बेला गोयल र गौतम यस्तो काम गरेर समाजमा उदाहरणीय बनेका छन् ।
