हेमोडायलासिस सुविधाका लागि महानगरले सेनालाई दियो डेढ करोड
काठमाडौं । काठमाडौं महानगरपालिकाले महानगरबासीको हेमोडायलासिस सुविधाका लागि नेपाली सेनासँग सहकार्य गरेको छ । छाउनीमा रहेको वीरेन्द्र सैनिक अस्पतालमा छुट्टै युनिट खडा गरेर स्थानीयलाई उक्त सुविधा दिन महानगरले एक करोड ५० लाख रुपैयाँ सेनालाई दिएको हो ।
नेपाली सेनासँग हेमोडायलासिसको सहकार्यको लागि वीरेन्द्र अस्पतालमा छुट्टै युनिट खोलिने र त्यसका लागि आवश्यक पूर्वाधार व्यवस्थापन गर्न उक्त रकम दिइएको हो ।
उक्त युनिटमा १२ वटा शैया हुनेछन् । सेनाले हेमोडायलासिसका लागि मेसिन तथा जनशक्ति तयार गर्न उक्त रकम प्रयोग गर्नेछ । महानगरबासीलाई सरकारले दिएको न्यूनतम शुल्कमा उक्त सुविधा उपलब्ध गराउन महानगरले सेनासँग ३ करोड दिने सम्झौता गरेको थियो ।
सोहीअनुसार आधा रकम हस्तान्तरण गरिएको हो । मेयर विद्यासुन्दर शाक्यले ५० प्रतिशत रकमबराबरको चेक सेनालाई हस्तान्तरण गरेका हुन् । उक्त युनिटमा मिर्गौलामा समस्या आएर जाने जो कोहीले हेमोडायलासिस गर्न पाउने महानगरले जनाएको छ ।
