दिलिप हत्या प्रकरणः लिभरले दाहिने कोखमा घोचेर घाइते बनाएपछि टिपरले टाउकोमा किचेर हत्या
जनकपुरधाम । धनुषाको श्रीपुरस्थित नदीमा बालुवा ढुंगाा उत्खननको विरोध गर्दा भएको दिलिप महतोको हत्या प्रकरणका अभियुक्तलाई प्रहरीले सार्वजनिक गरेको छ । प्रहरीले शनिबार पत्रकार सम्मेलन गरी उनीहरलाई सार्वजनिक गरेको हो ।
हत्यामा संलग्न चुरियामाई बालुवा प्रशोधन केन्द्र नामक क्रसर उद्योग संचालक बिपिन महतो, टिपर चालक मुनिन्द्र महतो, युवक रोशन यादव र लोडर चालक जितेन्द्र कुमार महतोलाई प्रहरीले पक्राउ गरी सार्वजनिक गरेको छ । प्रहरीका अनुसार अभियुक्तहरुले पहिले फलामको लिभरले दाहिने कोखमा घोचेर घाइते बनाएर अन्तिममा टिपरले टाउकोमा किचेर हत्या गरेको खुलेको छ ।
जिल्ला प्रहरी कार्यालय धनुषाका प्रहरी उपरीक्षक रमेश बस्नेतका अनुसार अभियुक्तहरुले दिलिपको कोखामा फलामले घोचेर गम्भीर घाइते बनाएपछि टिपरले टाउकोमा किचेर हत्या गरेका जानकारी दिएका छन् । टिपर चालक र लोडर चालक महतोले क्रसर संचालकको निर्देशनमा दिलिपलाई किचेर हत्या गरेको प्रहरी अनुसन्धानबाट खुलेको छ ।
मृतक दिलिपलाई बोलाएर लगेको भनिएका रोशनको पनि क्रसर संचालकसँग साँठगाँठ देखिएपछि पक्राउ गरिएको प्रहरीले जनाएको छ । शुक्रवार विहान २६ वर्षीय दिलिपलाई घर नजिकैको औरही खोलामा योजनावद्ध ढंगले हत्या गरिएको थियो ।
यो घटनामा इलाका प्रहरी कार्यालय ढल्केबरका प्रहरी निरीक्षक रामकुमार यादब र वडाध्यक्ष श्यामबाबु यादवको संलग्नता रहेको दाबी पीडित परिवारले गरेका छन् । घटनास्थलमै दिलिपको मृत्यू भएको अवस्थामा मुचुल्कासमेत नउठाई हतार हतार जनकपुर अस्पताल लगिएकाले उनीहरुमाथि पनि शंका गरिएको हो । तर प्रहरीले यसबारे केही पनि बोल्न मानेका छैन ।
घटनाको ३६ घण्टापछि शनिबार साँझ पीडित परिवारले दिलिपको शव बुझेका छन् । प्रहरीले मुचुल्का गलत बनाएको भन्दै पीडित परिवारले शव बुझ्न अस्वीकार गरेका थिए। पीडित परिवारको चित्त बुझ्ने गरी मुचुल्का बनेको विवरण प्रहरीले देखाएपछि शव बुझ्न तयार भएका हुन्।