अपहरित गाउँपालिका अध्यक्ष शाहीको कालिकोटबाट उद्दार
दैलेख । दैलेखको ठाँटीकाध गाउँपालिकाका अध्यक्ष धीरबहादुर शाही अपरहणमुक्त भएका छन् । शनिबार मध्यराति आफ्नै घरबाट नेत्रविक्रम चन्द ’विप्लव’ समूहबाट अपरहणमा परेका गाउँपालिका अध्यक्ष शाहीलाई कालिकोटबाट उद्दार गरिएको हो ।
प्रहरीको संरक्षणमा शुभकालिका गाउँपालिका १ छात्ती भन्ने स्थानबाट शाहीलाई सकुसल उद्धार गरिएको कालिकोटको शुभकालिका गाउँपालिकाका अध्यक्ष खडान्द्र चौलागाईंले जानकारी दिए ।
उनलाई गाउँकै एकजना घरमा लुकाउँन लगिँदै गरिएको बेला प्रहरीले उद्दार गरेको हो । अहिले गाउँपालिका अध्यक्ष प्रहरीको सुरक्षामा रहेका छन् ।
अपरहणमा परेकी शाहीकी श्रीमती इला मल्ल (शाही) दैलेख र कालिकोट जिल्लाको सिमानामा पर्ने भर्ता लेकमा शनिबार बिहान नौ बजेतिर सकुशल फेला परेकी थिइन् ।