स्थानीय तहले किन गरेनन् बास्तविक लाभग्राहीलाई आवास निर्माणका लागि सिफारिस ?
काठमाडौं । राष्ट्रिय पुनर्निर्माण प्राधिकरणले स्थानीय तहले लाभग्राहीहरुको झुटो विवरण दिने गरेको गुनासो गरेको छ ।
संसदको विकास तथा प्रविधि समितिको बैठकमा राष्ट्रिय पुनर्निर्माण प्राधिकरणका प्रमुख कार्यकारी अधिकृत सुशील ज्ञवालीले स्थानीय तहले बास्तविक लाभग्राहीलाई आवास निर्माणका लागि सिफारिस नगरेको गुनासो गरेका हुन् ।
उनले स्थानीय तहको कारण वास्तविक लाभग्राहीहरुको पहिचान गर्न समस्या परेकाले भूकम्पले ध्वस्त बनाएका आवास पुनर्निर्माणको काममा जटिलता थपिएको बताए ।
प्राधिकरणले आगामी पुस मसान्त भित्र निजी आवास पुनर्निर्माणका लागि भरिएका बाँकी गुनासाहरुको सम्बोधन गर्ने कार्य योजनाका साथ काम भइरहेको जनाएको छ ।
ज्ञवालीले ५० जना प्राविधिकलाई गुनासो सुनुवाईको काम सम्पन्न गर्न परिचालन गरिएको जानकारी दिए । प्राधिकरणको पछिल्लो तथ्यांक अनुसार १ लाख ९९ जनाले भरेका लाभग्राहीहरुको गुनासो सम्बोधन भईसकेको छ ।
प्राधिकरणले १४ प्रतिशत लाभग्राहीहरुको निजी आवास पुनर्निर्माणको काम सुरु गर्न बाँकि रहेको जानकारी समितिलाई दिएको छ ।
